Ход ход инээгээд...

Миний охин их "инээд муутай" хүүхэд л дээ. Биед элдэв зовиургүй л бол ганганаал, инээгээл хэвтдэг хүүхэд юм байгаан. Хоёр биенээ харж инээсэн том, жижиг хоёр хүн л байна, энд хэхэ...

энэ нөхөр нээрэн үнэнхүү аз жаргалтай мишээж байгааз? нээтээр зураг хайж яваад олсон юм :))

Хүүхэд инээж байхдаа хамгийн хөөрхөн. Анх улаан нялзрай өлгийтэй амьтан үнэгчилж инээхийг нь хараад л ээжийнх нь сэтгэл хайлчихсан. Үр минь дандаа инээж яваасай гэж тэгэхэд дотроо бодсон. Үнэгчилэхээрээ инээдэг охин минь удалгүй ээжийгээ хараад инээдэг боллоо. Хоёр нүдээ анийлгаж ирээд л, шүдгүй буйлаа гаргаад хичнээн хөөрхөн... Тийм хөөрхөн инээмсэглэлээрээ ээжийгээ өдөр бүр шагнадаг боллоо доо үр минь. Тэр хөөрхөн инээмсэглэлийнх нь зургийг ээж нь 28 хоногтойд нь авч хадгалсан. Хэвлүүхэн нь аргагүй инээж буй үрийн минь нялх төрх харах бүрт сэтгэлийг минь нэг л сайхан жаргалаар бялхуулдаг юм даа.

Өдөр ирэх бүр хүний ертөнцөд дасч, эргэн тойрноо ажиж "танилцах" үрийн минь инээмсэглэл бусдад ч бас гэрэл гэгээ түгээж буйг мэдрэх сайхан. Орны толгойд тохсон эрээн алчуур, дээрээс нь өлгөсөн тоглоом, даавууг нь хийдэг тор, гэрлийн бүрхүүл, жаазтай зураг, өвөөгийн зэс аяганд ойсон нарны туяа гээд л охиныг минь инээлгэдэг болгоныг би ч бас хайрлах болсоон. Миний үр чинь ямар ч хүнээс бишүүрхэхгүй. Өрхийн эмнэлэгт сар бүр очиж үзүүлэх тоолондоо эмч бүсгүйтэй бүр нэг сайхан инээж ханиагаад л "хөөрөлдөж" авдаг юм хэхэ.

"Ход ход инээгээд" гэж эхэлдэг нэг дуу байдаг даа. Хонгор үр минь одоо яг л тэгж ход ход инээдэг болоод байгаа. Гурван сар гаруйтайдаа орон дээр хэвтэж байхад нь авах гээд тонгойтол урдаас ход ход хийтэл инээдэг байгаа. Баярласан ээж ч охиноо хэд хэд тэгж инээлгэж авдаг юм байгаа биз дээ :) Ингээд л ээж, охин хоёр нэг шинэ тоглоомтой болсон доо.

Саяхан ээж нь охиноо том болчихсон байгаагаар зүүдэлсэн. Ээж рүүгээ инээгээд л ирж явсан юм, миний охин. Ээж нь сэрээд их баярласаан. Ход ход инээсэн миний нялх үр том болоод ч мишээл тодруулсан сайхан охин болно гэж итгэсэн. Тийм болохоор ээж нь Бурханаас олон юм гуйхгүй ээ. "Үр минь дандаа инээж яваасай" гэж л хүснэ. Ээжийнх нь ганцхан хүсэл энэ.